Trajneri i Luftëtarit, Julian Ahmataj ka folur pas fitores që skuadra e tij mori në shtëpi përballë Skënderbeut. Në një prononcim për ‘Supersport’, Ahmataj u shpreh se skuadra e tij nuk ka kohë për futboll të bukur por duhet të jetë cinike dhe të marrë vetëm pikët nga ndeshja.
“Ndeshja? Ishte ndeshje me vështirësi të lartë pasi luanim ndaj kampionëve. Vine pas një barazimi ndaj Teutës dhe fitore me Kukësin. Në lojë nuk kishin gabime dhe u munduam të ishim të kujdesshëm dhe provuam të godasim kur kishin pika të dobëta me topa të gjatë. Më bën të kënaqem pasi më jep besim. Nuk kemi kohë për të bërë lojë të bukur por duhet të shpëtojmë skuadrën nga rënia.
Aleksi? Të gjithë janë të rëndësishëm por ato që kanë më shumë vite janë shtyllë. Skuadra mori një hov pozitiv pasi lojtarët me eksperiencë e ndihmojnë skuadrën.
Fitorja? Të jesh në pozicione ku jemi ne, çdo pikë është e artë. Mund të jesh në ditë jo të mirë, por duhet të marrësh maksimumin në situatën që ndodhet. Më ngroh ekuilibri në lojë. Rastet ishin të pakta nga të dyja skuadrat dhe sa herë dilnim duhej goditur porta.
Pushimet? Pushimi vlejti shumë pasi kishim një skuadër dhe pavarësisht punës së mirë të kolegëve, erdhëm pa fazë përgatitore dhe patëm shumë ditë kohë për të përgatitur këtë ndeshje. Besuam deri në fund që të ndëshkonim kundërshtarin. Na shërbeu shumë kjo fazë pushimesh për t’u përgatitur më shumë.
Distanca me Kastriotin? Ne nuk kemi kundërshtar të tjerët por veten tonë. Duam të luajnë futboll siç duhet me parametra që kërkohet dhe duhet të merremi me skuadrën tonë. Kur të sigurojmë mbijetesën, mund të përdorim manovra sulmuese më të kënaqshme për tifozët dhe mund të bëjmë futboll ndoshta më të bukur. Çdo skuadre i bëjnë mirë fitoret. Edhe Luftëtarit i bëjnë mirë.
Luftëtari në Superiore para Tiranës? Është një skuadër që ka investuar në infrastrukturë dhe lojtarë dhe ka bërë zgjedhje të mirë lojtarësh prandaj mendoj se duhet të qëndrojë. Nuk kisha ardhur nëse nuk ia vlente të qëndronim në Superiore”, tha Ahmataj.
