Dy ditë më parë Argjirolajm.net publikoi mesazhin e një nëne nga Gjirokastra dërguar ‘Jeta Osh Qef’ lidhur me rritjen e pagesave për fëmijët në kopësht. Më pas ne kontaktuam me vetë nënën për të mësuar më tepër detaje rreth skemës se si Bashkia Gjirokastër zhvat prindërit në kopshtet publike, duke filluar që nga pagesa për lyerjen e kopshteve, për blerje tapeti, për mjete pune për fëmijët e deri tek vaktet ditore. Pak pasi ne e bëmë publike këtë çështje, reagoi në Facebook drejtori delirant i Agjencisë se Mirëqënies dhe Kujdesit Social në Bashkinë Gjirokastër, Armand Mamani.
Delirant sepse kujton se ne e kemi personale me të dhe sa herë del ndonjë lajm që ka lidhje me agjencinë e tij, Mamani ‘kakaris’ në Facebook, mundohet të bëjë si humorist, sajon ndonjë batutë dhe më tej pret konfirmimin përmes ‘Like-ve’ nga kryetarja dhe kolegët që i punojnë në bashki. Më e udhës do të ishte të jepte shpjegim për çështje të tilla dhe ne kemi detyrimin ta pasqyrojmë reagimin e tij siç kemi bërë në shumë raste, sesa të marrë role që as i takojnë e as s’i mban dot. Megjithatë ky është problemi i tij dhe raportit që ai ka me funksionin zyrtar, ndërgjegjen qytetare, median dhe të vërtetën. Sot ndërkohë ka pranuar për Tv Gjirokastra rritjen e tarifës për vaktin ditor të fëmijëve në kopësht dhe faktin që ajo nuk u aplikua në muajin janar sikundër u ishte thënë prindërve.
Në kronikën e përgatitur me këtë rast kishte edhe prindër që e kundërshtonin rritjen e çmimit, si dhe thonin gjithashtu se edhe në muajin e parë të vitit menuja ditore për fëmijët nuk kishte ndryshuar. Vetë drejtori deklaron se menuja e re nuk është aplikuar për shkak të procedurave. Kështu u kishte thënë prindërve edhe për blerjen e tapetit, që vonohej për shkak të procedurave prandaj zgjidhja ishte që ata ta blenin vetë dhe ashtu ndodhi në fakt. Vetëm Bashkia Gjirokastër ka kaq shumë procedura të ndërlikuara.
Mirë këta që kanë gjetur shesh e bëjnë përshesh, por këtu faji më i madh është i prindërve që zgjedhin të nënshtrohen, të ulin kokën dhe të paguajnë çdo tekë të bashkisë. E vërteta është se skema se si Bashkia Gjirokastër menaxhon kopshtet është abuzive. Nuk ka transparencë për fondet që u merren prindërve dhe njëkohësisht kopshtet humbasin funksionin publik për aq kohë sa prindërit paguajnë vetë çdo gjë. Shihni më poshtë kronikën e përgatitur nga Tv Gjirokastra dhe reagimin e Mamanit ditën që ne raportuam për problemin e kopshteve.
Drejtori aty aludon për ‘qytetarin dixhital’, pastaj i fanepset ‘Rilindja’ nga e cila përfitoi postin e drejtorit të spitalit prej nga ku u shkarkua për shkak të abuzimit me fondet publike. Qetësohu drejtor, se nuk je aq i rëndësishëm sa të merret njeri personalisht me ty. As me ty e as me shefen tënde. Bëmë publik shqetësimin e një nene që ka frikë të ta plasë ty dhe Zamira Ramit në sy apo edhe Këshillit Bashkiak që miraton vendime të tilla, prandaj zgjodhi të shprehet në kushte anonimati. Më pas duke njohur situatën në kopshte ne mbajtëm qëndrimin tonë kritikë, duke thënë se zhvatja që po u bëni prindërve në kopshtet publike është e turpshme. Sikundër është e turpshëm edhe heshtja kolektive e prindërve.Kaq!
©argjiroja.net