Luftëtari po përballet me një situatë jo pak të çuditshme duke qenë se largimet nga bluzinjtë nuk po marrin fund. Pas shumë largimeve të zyrtarizuara nga dita në ditë, sot një tjetër futbollist i ka dhënë lamtumirën bluzinjve.
Mbrojtësi Olti Rapa është futbollisti i radhës që largohet nga Luftëtari. Ka qenë vetë Rapa ai që nëpërmjet një postimi në rrjetin social “Facebook” ka njoftuar lamtumirën me bluzinjtë. Rapa luante në Gjirokastër prej 4 vitesh duke mbajtur në disa ndeshje edhe shiritin e kapitenit e madje duke u kualifikuar edhe për në Europë.
“Si çdo fillim ka dhe një fund. Ndaj dhe sot ka ardhur momenti, pas 4 vitesh të mrekullueshme dhe të paharrueshme si lojtar i Luftëtarit ku ka qenë një privilegj dhe nder që kam veshur dhe luftuar për atë fanellë. Ndaj para se të them mirupafshim . Doja të falënderoja së pari presidencën, gjithë stafet teknike që kam punuar, pa përjashtim gjithë çunat e gjithë këtyre viteve që kemi punuar së bashku si një familje e madhe, dhe gjithë tifozerinë e mrekullueshme të Luftëtarit që na kanë mbështetur në çdo moment dhe duke lënë shumë miq të veçantë dhe shumë kujtime të bukura në jetën time. Faleminderit Gjirokastra”, shkruhej në postimin e Rapës.
