Kryetari i Partisë Demokratike në Gjirokastër, Dasho Aliko, thotë se PS i ka blerë votat në zgjedhjet e fundit. Gjatë një interviste për TV Gjirokastra, Aliko tregon se paratë shpërndaheshin me thesë nga drejtorë të socialistëve, por pa dhënë emra konkretë.
“Ju vetë jeni dëshmitarë edhe këtu në Gjirokastër se si ne bridhnim këmba këmbës për të kapur njerëzit me thasë, drejtorat e PS-së dhe më gjerë. Me thasë me lekë në xhipat e tyre për të blerë votat në institucione të ndryshme dhe në fshatra të ndryshme. Kjo nuk mund të kalohet më kështu sepse vajtëm 29 vjet që Shqipëria është në tranzicion. Ne luftojmë për një kauzë të drejtë, që Shqipëria të jetë si gjithë Evropa”, tha Aliko.
Mund të jetë vërtet kështu siç thotë kryetari i PD Gjirokastër, që drejtorët e PS-së kanë shpërndarë para me thasë për të blerë vota. Por pyetja që shtrohet është kjo: Përse ne duhet të besojmë çfarë thotë Dasho Aliko pa dhënë asnjë emër? Nëse ai i ka emrat, përse nuk i thotë publikisht dhe përse nuk shkon në polici dhe prokurori të bëjë denoncimet? Vetëm në këtë mënyrë Aliko dhe PD-ja mund të bëhen të besueshëm. Sa për sy e faqe apo për retorikë politike ne kemi dëgjuar plot akuza në Shqipëri në gjithë këto vite.
©argjiroja.net