Prej disa ditësh me ardhjen e Flamur Golemit si kryebashkiak dhe emërimin e drejtorit të ri të Agjencisë së Shërbimeve Publike ka nisur një aksion për pastrimin e territorit nga mbetjet urbane të hedhura pa kriter. Natyrisht që kjo është dicka pozitive edhe pse jemi mësuar shpesh me aksione sa për zhurmë e populizëm. Por një ditë më parë Golemi ka bërë edhe një ‘gafë’ ose le të themi nuk është treguar politikisht korrekt.
Me vetëdije apo jo këtë s’e dimë me siguri. Po çfarë ka ndodhur konkretisht? Bashkia Gjirokastër ka shpërndarë disa foto nga aksioni për pastrimin dhe sistemimin e varrezave të dëshmorëve nacionalistë pranë zonës së Gërhotit. Aty prezent ishte edhe kryebashkiaku Flamur Golemi.
Pra, një kryebashkiak i majtë nderon ata që zyrtarisht nga PS-ja dhe ish PPSH-ja konsiderohen si kolaboracionistë të nazifashistëve. E thënë më thjeshtë qëndrimi zyrtar i PS-së ka qenë dhe mbetet ai se ballistët bashkëpunuan me nazifashistët në dëm të interesit kombëtar. Kësisjoj PS është distancuar gjithmonë ndaj tyre.
Që punëtorët e Ylli Muhos të pastrojnë varrezat ku prehen dëshmorët ballistë nuk ka asgjë të keqe. E kanë detyrë funksionale si agjenci dhe natyrisht është gjest njerëzor. Por kur shkon aty kryebashkiaku për të parë punimet dhe për të bërë le të themi një lloj homazhi, kjo merr një peshë simbolike që nuk mund të kalohet në heshtje.
Ose Flamur Golemi e ka bërë me dashje këtë ‘provokim’ ose e ka bërë nga naiviteti politik. Por ka edhe një mundësi të tretë. Ai e konsideron këtë gjë krejt normale që pasi kryetari i PS-së dhe kryeministri Rama nderoi para ca kohësh Mit’hat Frashërin dhe ktheu eshtrat e tij në Shqipëri.
©argjirolajm.net
