Nga Mentor Kikia
Bashkitë, në Tiranë dhe qytete të tjera, janë duke bërë gjithëçka munden për të mbështetur shtresat në nevojë, ata që jetesën e kanë të varur nga puna që bëjnë çdo ditë, por edhe ata që jetojnë në vetmi. Në këto kushte, kur të moshuarit janë urdhëruar të mos dalin fare nga shtëpitë, si pjesa më e rrezikuar e shoqërisë, duhet të jemi ne të tjerët që tu vijmë në ndihmë. Ka shumë të moshuar që jetojnë vetëm për shkak të emigrimit të fëmijëve. Ata nuk munden të dalin në rrugë që të bëjnë blerjen e artikujve ushqimorë apo ilaçeve. Çdo kush prej nesh mund të ndihmojë të moshuarit që jetojnë vetëm në pallatin e tij, në bllokun e tij, në lagjen apo fshatin e tij. Nëse në pallatin tënd jeton vetëm ndonjë çift i moshuar, apo një person i vetëm, mund ti trokisni në derë e ta pyesni nëse ka nevojë për ndihmë. Kur të blini bukën dhe ushqimet tuaja, mund tua blini dhe atyre. Askujt nuk i kushton asgjë. Jo të gjithë janë në kushtet e pamundësisë financiare, por ka shumë që janë në kushtet pamundësisë fizike. Unë ftoj të gjithë anëtarët e Korpusit të Vullnetarëve, që deri në përfundimin e kësaj situate, kur do të nisim aksionet e pastrimit në bregdet, ti kushtohen ndihmës ndaj të moshuarve të vetmuar. Beje edhe ti!
