Bashkia Gjirokastër ka urdhëruar sot mbylljen e një pike të furnizimit me karburant pranë lagjës “Punëtori”, për shkak se ajo funksiononte në informalitet prej vitesh. Vendimi për mbyllje është marrë dhe ekzekutuar në bashkëpunim me Inspektoratin Shtetëror Teknik dhe Industrial. Subjekti që kishte këtë biznes nuk ishte pajisur me leje ndërtimi për pikë karburanti nga Bashkia Gjirokastër.
Duke mos pasur leje ndërtimi, rrjedhimisht ushtronte veprimtarinë edhe pa autorizim, të cilin e jep po bashkia kundrejt një tarife vjetore. Argjirolajm.net mëson se subjekti kishte tentuar ta legalizonte ndërtimin, por që i është refuzuar nga ALUIZNI (sot ASHK) sepse nuk plotëson kriteret ligjore për legalizim.
Ndërkohë që kemi parë në këto vite me dhjetra raste se si procedohen apo arrestohen hallexhinj për ndërtime pa leje, është i habitshëm fakti se si ka operuar prej vitesh një biznes i tillë pa leje ndërtimi dhe pa autorizim nga Bashkia Gjirokastër.
Ky rast, që me siguri nuk është i vetmi, nxjerr zbuluar autoritetet shtetërore për standardet e dyfishta që përdorin, si dhe krijon dyshime për korrupsion, ryshfet apo lidhje okulte në shkelje të ligjit mes biznesit e zyrtarëve të shtetit. Aktualisht në territorin e Bashkisë Gjirokastër operojnë rreth 20 pika të furnizimit me karburant.
©argjirolajm.net
