Identifikohen 2 nga 4 shqiptarët që u arratisën nga burgu grek në Athinë. Mediat në Greqi shkruajnë se Endrit Bagaj dhe Alesio/Astrit Xhelo janë dy shqiptarët e parë që janë identifikuar. Një prej të arratisurve u arrestua në mëngjes rreth orës 07:00, por nuk dihet ende emri.
Shqiptarët fillimisht kanë thirrur rojet për ndihmë, kur njëri prej tyre u shtri në tokë dhe bënte rolin e të sëmurit. Sapo rojet hynë në qeli, i kërcënuan me thikë të improvizuar, u morën armët dhe celularët dhe i mbyllën brenda. Më pas zbritën në katin e parë, ku kërcënuan një tjetër polic që ndodhej në makinën e transferimit, morën automjetin dhe u drejtuan në hyrjen e burgut ku përsëri kërcënuan me armë rojën tjetër.
Të arratisurit morën armë dhe celularë, të cilat u përdorën në shkëmbim zjarri, pa të plagosur. Të arratisurit braktisën makinën e policisë pak metra larg burgut. Deri më tani vetëm njëri prej tyre është arrestuar. Pak ditë më parë të arratisurit kishin qenë protagonistë të një episodi dhune në burgun e Koridhalos në Athinë.