Përpara se të ndahej në mënyrë të papritur nga jeta, Armand Hysi ka dhënë një intervistë për gazetarin e Radio Saranda, Shkëlqim Hajno.  Ai foli për punën e tij në krye të Zyrës së Hipotekës në Sarandë. Mësohet se Hysi, 44 vjeç ka qenë në zyrë kur dyshohet se ka pësuar një infarkt, çka ka sjellë dhe vdekjen e menjëhershme të tij. Përveç detyrës si drejtor i Hipotekës, Hysi ishte pedagog në Universitetin “Eqrem Çabej” në Gjirokastër dhe anëtar i Këshillit Bashkiak të Sarandës.

Mësohet se miq dhe persona që ndodheshin pranë tij e kanë çuar me urgjencë në spital por gjithçka ka qenë e kotë. Burime nga spitali i Sarandës bënë me dije se 44-vjeçari ka mbërritur i pajetë.

Lajmi ka tronditur jo vetëm familjen por dhe miqtë dhe ata që e njihnin, pasi Hysi nuk kishte pasur më parë probleme shëndetësore dhe sipas miqve të afërt nuk ka pasur ankesa për shëndetin. Ai përflitej edhe si një nga personat e mundshëm për të qenë kandidat për kryetar bashkie në Sarandë nga Partia Socialiste. Dëgjoni në videon më poshtë intervistën e tij të fundit.