3 muaj pa rroga te Luftëtari, lojtarët bëjnë gati valixhet për t’u larguar nga Gjirokastra

Na ndiqni në Facebook dhe Instagram:
  • Facebook
  • Instagram
  • Youtube

Pritej të ishte sezoni i konfirmimit për Luftëtarin por duket se në Gjirokastër kanë shkatërruar gjithçka me duart e tyre. Zgjedhja për t’i besuar një trajneri të huaj rezultoi zgjidhja e gabuar, por tashmë që ekipi në fushë po përgjigjet dalin në pah probleme të tjera. Problemet financiare, që nuk ekzistojnë vetëm tek Luftëtari, po minojnë ecurinë e skuadrës, pasi lojtarët janë të përqendruar më së shumti për të zgjidhur këtë situatë, duke humbur përqendrimin në fushë.

Goli i pësuar ndaj Kukësit në minutat e fundit është mungesë qetësie dhe përqendrimi, me një pjesë të futbollsitëve që kanë nisur procedurat për të kërkuar divorcin në muajin janar. Tashmë në mendjen e tyre është vetëm një alternativë, të dërgojnë dokumentat në zyrat e klubit dhe të federatës shqiptare të futbollit, për të kërkuar prishjen e kontratës për shkak se ka kaluar afati 3 mujor i detyrimeve financiare ndaj tyre.

Në një situatë të tillë rikthehen hijet e zhgënjimit tek bluzinjtë që pas kombinimeve të rezultateve në javët e fundit shohin pranë dhe rrezikun për tu rikthyer në zonën e rënies, pozicion të cilin e lanë pas që nga ardhja e Gentjan Mezanit në krye të skuadrës. Deri në përfundim të kësaj faze janë edhe 3 javë, me Luftëtarin që do të përballet në transfertë me Kamzën një kundërshtar direkt, dhe më pas në Korçë me Skënderbeun. Viti do të mbyllet në shtëpi me Partizanin, një kalendar që shton akoma më shumë koeficientin e vështirësisë në një situatë të tillë, kur futbollistët konsiderohen të tradhtuar nga drejtuesit, pas mungesës së korrektësisë financiare.

Sondazh: Votoni personazhin e vitit 2018 në Gjirokastër (lista me 10 kandidatë)