Në mbledhjen e sotmë të Këshillit Bashkiak, kryetari Flamur Golemi denoncoi edhe një paraktikë sipas tij të pazakontë me shërbimin në varrezat publike të qytetit. Ai foli për një kompani, tek e cila njerëzit që u ndodhte një fatkeqësi, paguanin 210 mijë lekë të vjetra vetëm për shërbimin e hapjes së varrit.
“Nëse kishe fatkeqësi në familje, për të kallur të ndjerin në varrezat publike, duhet të paguaje përmes kësaj kompanie. 210 mijë lekë për të hapur një gropë në varrezat publike. Kompania kishte për detyrë sipas kontratës edhe të mirëmbante varrezat, por që në fakt këtë shërbim e bënin punëtorët e bashkisë. Kjo aferë do të marrë fund brenda këtij viti. Biznes me të vdekurit nën ombrellën e Bashkisë Gjirokastër nuk do të bëhet më. Ky shërbim do të ofrohet nga Bashkia. Nuk do ta bëjë më as motra as vëllai i kryetarit të bashkisë’, tha Flamur Golemi.
Por kryebashkiaku i Gjirokastrës nuk e përmendi emrin e kompanisë dhe kush qëndronte pas saj. Me siguri që një biznes i tillë nuk mund të bëhej pa patur disa fije që të lidhin me titullarë të bashkisë. Në fund Këshilli Bashkiak miratoi një vendim që ky shërbim i hiqej kompanisë private.
©argjirolajm.net
