Pas tërmetit që shkatërroi ndërtesa të tëra në Durrës dhe në Thumanë, shumë banorë u shpërngulën në zona të tjera të vendit. Midis banorëve të shpërngulur janë edhe nxënës të arsimit të detyrueshëm. Vetëm në qarkun e Gjirokastrës, 11 nxënës janë regjistruar për të vijuar procesin mësimor atje.
Që prej tërmetit të 26 nëntorit në drejtim të qarkut Gjirokastër janë zhvendosur rreth 672 qytetarë. Nga informacionet e fundit nga mbrojtja civile e 7 bashkive të qarkut deri në orën 14:00 të datës 03.12.2019 raportohet se:
1.Në bashkinë Përmet të gjithë të banorët e ardhur dhe akomoduar në hotele apo të afërmit janë larguar drejt vendbanimeve të tyre.
Në bashkinë Gjirokastër të gjithë të banorët e ardhur dhe akomoduar në hotele apo të afërmit janë larguar drejt vendbanimeve të tyre. Në bashkinë Këlcyrë deri në këto momente janë strehuar 167 qytetarë.
– Nga qyteti i Këlcyrës janë larguar të gjithë të ardhurit.
– Në Njësinë Administrative Dëshnicë janë aktualisht 45 veta të rritur dhe 17 fëmijë.
– Në Njësinë Administrative Sukë janë aktualisht 47 veta të rritur dhe 18 fëmijë.
– Në Njësinë Administrative Ballaban janë aktualisht 30 veta të rritur dhe 10 fëmijë.
Nga bashkitë Dropull, Libohovë, Tepelenë dhe Memaliaj nuk raportohen persona të ardhur nga zonat e dëmtuara nga tërmeti.
“Ju bëjmë me dije se të gjithë personat e strehuar tek të afërmit ose banesat e tyre janë në pritje të hapjes së shkollave dhe çerdheve në zonën e prekur nga tërmeti.
Gjithë këta persona nuk kanë dëmtime të rënda apo të lehta në banesat e tyre. Shumica e tyre janë pensionistë.
